Dîwana Edaletê ya Ewropayê (CEJ), serlêdana ku ji aliyê PKK û KONGRA-GEL ve li hemberî "lîsteya terorê" ya Yekîtiya Ewropayê vekiribû, biencam kir. Dadgehê ji bo aşkerakirina biryarê daxuyaniyek kurt da û biryara Konseya Wezîran a Ewropayê, şermezar kir. Di daxuyaniyê de hate gotin ku "Dadgehê biryara Konseyê ya têkildarî PKK û KONGRA-GEL'ê betal kir." Danişîna yekemîn a doza ku PKK û KONGRA-GEL li dijî lîsteya 'rêxistinên terorê' li Dîwana Edaletê ya Ewropayê vekiribû, di dawiya meha çileyê de li Luksemburgê hatibû dîtin. Danişîn, nêzî saetek dom kiribû û PKK û KONGRA-GEL ji aliyê 4 parêzerên îngîlîz ve hatibûn parastin. Parêzeran li dijî "lîsteya terorê" 10 klasorên tije delîl bûn pêşkêşî dadgehê kiribûn. Parêzeran gotibûn ku di pêvajoya agirbestê de PKK û KONGRA-GEL di nav lîsteya "rêxistinên terorê" de hatine bicihkirin, ev jî tiştek şaş e. Parêzeran dabûn zanîn ku PKK di nav lîsteyê de hatibe bicihkirin, ev xizmeta aştiyê nake. Parêzeran her wiha ji dadgehê xwestibûn ku biryara 'ev biryar ne adilane ye' bide.

Ji aliyê TPI ve biryara bêrayetiyê hatibû girtin

PKK, di 2'yê gulana 2002'yan de tevlî lîsteya "rêxistinên terorê" hatibû kirin. KONGRA-GEL ku di cotmeha 2003'yan de hatiye avakirin. Di sibata 2004'an de tevlî lîsteya "rêxistinên terorê" hatibû kirin. Li hemberî doza ku PKK'ê di cotmeha 2002'yan de vekiribû, Dadgeha Asliyeya Hiqûqê (TPI) ya Dîwana Edaletê ya Ewropayê (CEJ) biryara bêrayetiyê dabû û paşve zivirandibû. Lê Dozgera CJE'yê Julîane Kokott, di îlona 2006'an de aşkera kiribû ku dikarin serlêdana îtirazê ya ku PKK'ê kiriye, bi awayê hiqûqî binirxînin. Dîwana Edaletê dadgeha herî bilind a YE'yê ye, loma dikare biryarên ji aliyê dadgehên netewî ve hatine dayîn jî xera bike û ji nû ve binirxîne.